December 18, 2008

Lebih 11,000 nyerumba ‘Aya Ragum’ masuk PKR

SIBU: Kaban Kunsil Nengeri Ngemah Gabriel Adit Demong, 58, diatu masuk Parti Keadilan Rakyat (PKR).Pom minta masuk nyadi kaban parti nya udah disua iya ngagai Penyanding Penemu PKR Datuk Seri Anwar Ibrahim pukul 9 malam hari Enam tu tadi ba pengerami makai lemai ke diatur Kaban PKR ditu.Anwar ke mega Ketuai Penyakal, nyadi ketuai pengerami nya ke digulu urung bisi 4,000 iku mensia mayuh.Lebuh ke bejaku, Adit ke chermin pengatur pengerami makai lemai nya madah, iya empu endang sigi udah sedia deka matak jalai ka bala rayat Sarawak ngena PKR.“Enti sema Anwar nyadi Perdana Menteri ila, nya ngasuh aku mudah agi berandauka pekara ti nguntungka rayat enggau iya, lalu ngichaka nya tau mai laba ngagai semua rayat. Pekara nya beguna amat,” ku iya.Adit ke kekadang dikangau orang ‘Aya Ragum’ tauka ‘Ragum’ mega madah, iya ukai kediri masuk PKR.Ku iya, sekeda bala kaban Barisan Nasional (BN) mega bisi madah peneka diri enggau masuk PKR enda lama agi.“Kelimpah ari aku empu, sekeda bala orang BN mega deka sama enggau masuk PKR enda lama agi. Aku enda ibuh nyebut nama sida ditu laban manah agi nganti sida empu ngemansutka diri.“Aku nemu sapa sida, laban kala betemu enggau sida ba rumah Anwar suba,” ku iya.Lebuh ditanya pasal pemutus runding iya masuk enggau PKR, Adit madah iya nadai jalai bukai, laban BN endang udah nutup rapit pintu ngagai iya udah tembu pengawa bepilih 2006 suba.Ku iya, pengawa iya ke masuk enggau PKR mega udah bulih sukung setuju ari bala penyukung iya.Dalam pengerami ti sama Adit mega nyerah 11,753 pom minta masuk enggau parti nya ari bala orang ke nadai parti sebedau tu ari serata menua Sarawak, nyengkaum 6,000 ari penyukung iya empu.“Enggau tu, aku minta semua bansa Dayak di Sarawak ke nadai alai dalam BN ngambika sama enggau masuk PKR,” ku Adit nambah agi.Anwar dalam jaku iya ba pengerami nya madah, iya balat temegah agi enggau pemerani sereta pengempang Adit ke masuk enggau parti penyakal.“Penemu Adit ke milih sereta mutuska runding masuk enggau parti kami bala penyakal enggau penatai bala mensia mayuh malam tu siti pengayan ti terang sapa ti dikedeka rayat Sarawak nyadi perintah megai sida di menua tu,” ku Anwar.Chermin PKR Sarawak ke mega kaban KN tunggal parti nya di Sarawak Dominique Ng gaga endar meda Adit masuk enggau parti nya laban diatu iya enda kediri agi dalam Kunsil Nengeri.“Udah Adit masuk dalam PKR, aku enda kediri agi gawaka rayat,” ku iya.Keterubah Adit menang kerusi Ngemah dalam 1991 ngena tiket Parti Bansa Dayak Sarawak (PBDS) ke diatu udah dirumpang.Iya udah nya mujur ngetanka kerusi dalam 1996 ngagai 2001.Dalam taun 2006 iya bediri nyadi chalun ngatika diri, lalu menang sekali agi kerusi nya ngalahka chalun BN-PRS, Alexander Vincent.Sama bisi datai bala ketuai PKR nyengkaum Ketuai Penyambung PKR Datuk Dr Jeffery Kitingan, Ketuai Publisiti Tian Chua, Sekiteri Besai Datuk Sallehudin Hashim enggau Penyanding Penemu PKR Sarawak, Dato Sri Hafsah Harun.Sama datai meri sukung sida nya Chermin Parti DAP Wong Ho Leng sereta enggau Kaban KN Kidurong Chew Chiu Sing.

No comments: